騎呢? 冷門?

睇波既人十個有十個都一定有儲開波衫既習慣，正版又好，新興詞彙泰版或歐版（我都唔明邊條茂利諗個咁嘅名來坤人？感覺上好似去茶記叫俄羅斯豬扒飯，瑞士雞翼，星洲炒米一樣），球員版，落場版之類問題，只係大家儲開嘅喜好係 乜，多與少嘅問題。有D人鍾意乜都儲，無論國家隊又好，球會又好。有D人鍾意有要字又要章又要號碼。有D淨係儲某隊球會或聯賽。。。。。

小弟係紐卡素球迷，當然盡量會儲開有關紐卡素嘅嘢不論波衫，場刊都有。本來亦儲得好雜吓，基本上係乜都儲，但後來一來發覺咁落去唔係辦法皆因銀根有限，二來好似漫無目的，三來亦都無咁多位同時間去處理。慢慢發覺本身喜好係一D冷門騎呢國家隊，所以決定唔再儲或買球會波衫除非係好特別或紐卡素除外。而本身亦都好鍾意睇地圖同旅遊相關書籍文章，發覺搵波衫之餘亦發現好多足球以外嘅有趣事。亦從此決定從這方向進發。

我係唔會專登去印字印章，原因（1）太貴，隨時貴過件衫，唔化算。（2）太多假字章，買件衫要留意真假新舊已經夠煩，加埋字章真係嫌唔夠多嘢做麼？（3）我D大部份係冷門嘢點搵所謂嘅原裝字章？（4）識得邊個？我件瓦努阿圖唔通真係攞去印陳啟泰麼？（5）個人來講覺得印咁多嘢落去反而破壞咗件衫原來嘅欣賞價值。

我唔敢講我有好多衫或好多冷門嘢，相比外國好多收藏家我十份一都未到，不過慢慢儲分享下當係一個歷程等認識多D朋友。

同時小弟亦寫緊一本關於Non FIFA足球嘅著作，不日上映，文筆有限，如有遺漏錯失務必通知小弟！！！！！感激不盡！！！！！

小弟目標係盡可能儲齊咁多個國家隊嘅波衫！！！！！（錢係個最大問題XD）